ROXAS CITY, CAPIZ- Nakahunong na sa subong sa karsel sang Roxas City Component Police Station ang ginakabig gabunan nga kawatan sa syudad nga si alyas Ruby “Arikis” matapos ginserbehan sang warrant of arrest sang mga kapulisan sa kaso nga ‘robbery’ ukon pagpangawat.
Sa interview sang Bombo Radyo kay Police Chief Master Sergeant Ramil Arcangeles, Spokesperson sang Roxas City Component Police Station, iya ginpahayag nga isa sa mga biktima ni alyas Ruby nga ginkuhaan niya sang mga pagkabutang ang nagpangisog nga mag-file sang complaint sa korte.
Suno kay Arcangeles, Setyembre 5 naguwa ang order gikan sa korte kag natigayon nga madakpan si alyas Ruby sini nga aga sa Burgos Street, Roxas City.
Pahayag pa nya, naglab-ot sa P48,000 ang ginrekomendar nga pyansa sang korte para sa temporaryo nga kahilwayan ni Ruby.
Nahibaluan nga si alyas Ruby ang madamo na sang mga reklamo sang pagpangawat sa mga balaligyaan kag pila ka puluy-an sa syudad sang Roxas apang indi mapreso sang kapulisan bangud nga wala anay sang may nagapasaka sang kaso.
Interviewed by Bombo Francis Biñas
