TAPAZ, CAPIZ- Kasunod sang pagka diskubre sang abandonado nga hide out sang New People’s Army (NPA) sa Sitio Naatip, Barangay Lahug, Tapaz, Capiz, sang Hunyo 16, 2025, nagpanawagan ang mga otoridad sa mga myembro sang rebelde nga magbalik na sa sabak sang gobyerno.
Sa interview sang Bombo Radyo kay Colonel Erwin Rommel Lamzon, Assistant Division Commander of Administration sang 3rd Infantry Division sang Philippine Army, ginpahayag sini nga may malapad nga programa ang gobyerno para sa mga luyag magbalik-loob, lakip na diri ang Enhanced Comprehensive Local Integration Program (E-CLIP).
Dugang pa sini nga ang E-CLIP ang nagahatag sang ikaduha nga kahigayunan sa mga dati nga rebelde pinaagi sa livelihood assistance, skills training, kag psychological intervention. Ginklaro man niya nga ang mga magapasakop sa programa ang ginahatagan sang seguridad kag ginapaidalom sa amnesty program.
Samtang, gin-athag sini nga wala sang dapat nga kahadlukan ang mga rebelde nga luyag magbalik sa sabak sang gobyerno, bangud nga may proseso para sa disposisyon sang mga isyu legal nga ila ginapangatubang.
Ginalauman sang gobyerno nga ang panawagan magabukas sang tagipusuon sang mga yara pa sa rebelde nga grupo, kag magdesisyon na nga isalig ang ila kabuhi sa malinong kag mas madinalag-on nga dalan.
