ROXAS CITY- Ginreklamo sang pila ka mga indibidwal ang isa ka babayi matapos ang ginhimo sini nga pagpanunto sa ila sa pagpasalig nga makapadulong sa Australia agud magtrabaho bilang isa ka caregiver kag iban pa.
Sa mga ginpakigbahin sang mga wala na ginhingadlan pa nga mga biktima sa Bombo Radyo Roxas, lunsay gintuad sang mga ini nga nakilala kag nagsugod ang pagtransakyon nila sa gina-alegar scammer nga ginkilala kay Marissa Basinang 67 anyos, isa ka retired teacher nga taga Brgy. Dulangan, Pilar Capiz sang nakaligad nga tuig humalin sang bulan sang Pebrebo kag Setyembre 2023.
Suno sa mga biktima lunsay sila naghalatag sang ginapangayo nga mga kantidad ni Basinang nga P10,000 kag masobra pa, nga kasubong bayad sa pagproseso sang pila ka mga kinahanglanon nga dokumento kag subong man bayad sa agency nga Legacy nga amo ang magabulig palakat sa ila sa Australia apang wala man gali gaeksister.
Maluwas diri, gintuad pa sang mga biktima nga ila man natukiban nga nagagamit man si Marissa sang nagkalain-lain nga apelyido sa tion nga magbaton ini sang bayad nagikan sa ila kaangay sang Cowan, Baker, kag Basinang bangud man sa gin issue sini nga isa ka resibo nga papel nga pirmado man sini.
Nagdugay naman sang pila ka bulan ang ila nangin transaksyon kay Marissa sa paglaum nga makapadulong gid man sila sa Australia apang napaslawan ang mga ini kag diri na nila natukiban nga sila gali ang gina-alegar nascam na.
May pila man suno diri ka mga biktima si Marissa nga lunsay sini ginbalikan sang ila ginhatag nga kwarta apang nagpabutyag sa gihapon sang kalain buot sa iya bangud pila sa ila ang nalubog sa utang kag nagbiya ukon nag-untat sa ila pagtrabaho.
Sa karon, gindangup na sang mga biktima sa nagaka-igo nga ahensya sang gobyerno ang ila reklamo kag nagalaum sila nga indi na madugangan pa ang mga biktima kag mapanabat si Marissa.
Nagapati naman ang mga biktima nga kakuntsabo man ni Marissa ang bana sini nga isa ka Australiano subong man ang mga kabataan sini sa paghimo sang pagpanunto kag may mga nabiktima man ini nga indi lang taga probinsya sang Capiz kundi mangin sa iban nga lugar sa pungsod bangud may mga nangin kaupod man ini sila nga nagpaidalom sa TESDA training sa Manila para makakuha sang NCII sa caregiving.
