Nagapangayo sang bulig sa lokal nga gobyerno sang Batangas ang isa ka iloy nga Capizeña mga may ara sang duha ka mga kabataan nga naga-estar malapit sa nagaalburoto karon nga Bulkang Taal.
Sa interview sang Bombo Radyo kay Salvi Domopoy, sang Brgy. Libas Roxas City, ginpahayag sini nga duha niya ka mga kabataan nga si Ivin kag Debbie Dumopoy ang madugay na naga-estar sa Buso-buso, Laurel, Batangas.
Nagakahangawa ang nasambit nga iloy matapos nga makabaton ini sang mensahe gikan sa iya anak nga si Debbie natuhoy sa sitwasyon sang nasambit nga bulkan.
Suno sa ginang nga yara na karon sa hilway nga kahimtangan si Debbie apang ang isa sini ka anak nga si Ivin ang nagakinahanglan sang tabang bangud nga na-trap ini sa ila balay kasunod sang naghugpa nga mga bato nga naga-balabag sa dalan.
Nagalaom ang ginang nga pinaagi sa Bombo Radyo, mabuligan kag ma-rescue sang lokal nga gobyerno sang Batangas ang iya anak.
