ROXAS CITY – Todo-depensa karon ang isa ka ginang nga nagpakot natuhoy sa natabo sa anom ka bulan nga lapsag nga nalumos sa Sitio Terel, Barangay Tanque, Roxas City.
Sa ginpatawag nga sinapol sang konseho sang nasambit nga barangay, ginpahayag ni Mrs. Sherly Dela Torre nga wala siya sang may ginhambal nga gintaban sang mga aswang ang nalumos nga lapsag.
Suno sa iya nga indi man siya sang surhana ukon ‘mediko’ bangud manugluy-a luy-a lamang ini.
Ginpahayag pa niya matapos ang iya ginhimo nga ritwal, naghambal lamang siya nga may nagkursunada sa nasambit nga lapsag nga malain sang ginhawa.
Apang gintadlong sini nga wala siya sang ginhingalanan nga mga indibidwal kag suno sa iya, ang mga tawo na mismo ang nagpatu-pato nga aswang ang yara sa likod sa kamatayon sang nasambit nga lapsag.
Ginapanindugan sang ginang nga indi siya ang dapat nga basulon sang paglapta sang estorya nga gin-aswang sang mag-asawa ang nasambit nga lapsag bangud matinlo ang iya konsensiya nga wala siya sang kasubong nga estorya nga ginpaguwa.
Matandaan, nga nasaksihan mismo sang Bombo Radyo ang ginapahayag pagpatpat sang ginang sang nakaligad nga adlaw sang Sabado sang natabo ang pagkadula sang lapsag.
Didto kag nagguwa mismo sa bibig ni Dela Torre nga may yara sang mag-asawa sa tabok sang balay nga gina-estaran sang lapsag nga yara sa likod sang pagkadula sang lapsag.
Apisar wala sang may ginhingadlan nga mga indibidwal ang ginang, nagtuga sang konklusyon sa mga tawo ang pahayag sini bangud sa tabok sang balay nga gina-estaran sang lapsag, may mag-asawa man nga naga-estar.
Apang kasubong ginpanginwala ini tanan ni Dela Torre sang nagpakigsapol na ini sa barangay kag nagbaliskad na ang tanan niya nga pahayag agud matinluan ang iya nga pangalan.
