ROXAS CITY – Matigdas nga ginsiling sang pamilya sang mangunguma nga nadakpan nga ginapahayag nabaklan sang armas luthang sa Barangay Lanot, Roxas City sang damlag lang nga wala sang kamatuuran nga nagahupot sang armas luthang ang ila himata.
Mahibaluan nga ginkilala ang nadakpan kay Jovanne Bajada 54-anyos kag residente sang nasambit nga lugar.
Sa pagpakig-angut sang Bombo News Team kay Wilma Gabucay, gumangkon ni Bajada ginpahayag sini nga sang natabo ang insidente nagapahuway ang iya tiyo nga nagikan sa uyapad sang hinali lamang nga nag-abot ang 4 ka mga nagpakilala kapulisan kag hinali na lang ini nga gindala sa sulod sang puluy-an ang iya tiyo kag ginpusasan.
Suno kay Gabucay, imposible nga nagikan sa iya tiyo ang armas luthang nga calibre .38 homemade revolver nga nakuha sang mga kapulisan bangud wala ini nila nakitaan.
Sa separado naman nga interview kay Mark anak ni Gabucay, ginpahayag sini nga tuman ang iya kakibot sang mabatian nga nagahilibion na ang iya amay nga naga-eksplekar sa kapulisan nga indi iya ang nasambit nga armas luthang.
Ginalantaw nga ugat sang insidente ang indi pag-intindihanay sang iya amay kag kaingod sini nila balay.
Matandaan nga nakuha kay Bajada ang armas luthang nga calibre .38 homemade revolver nga ginapahayag nabaligya sa balor P2,600.00, P100.00 marked money, P2,500.00 nga counterfeit/boodle money, 3 ka bala sang nasambit nga armas luthang.
