PANITAN, CAPIZWala sang kamatuuran ang ginapahayag shooting incident nga nagluntad sa boundary sang Barangay Agkilo kag Barangay Concencia, Panitan, Capiz.
Sa interview sang Bombo Radyo kay Police Captain Merry Chris Dela Cruz, Police Information Officer sang Capiz Police Provincial Office, iya ginpahayag nga may nagpalab-ot sa ila sang impormasyon nga may ginaalegar shooting incident sa amo nga lugar. Apang sa ila nga pagpadulong, wala manlang sang kun ano nga mga pagkabutang ang narekober, subong man sa suspek ukon biktima.
Suno kay Dela Cruz, maskin ang mga residente nga ila gin-usisa, wala man sang may nahambal nga may nagluntad nga shooting incident.
Pahayag niya, naggwa sa ila nga imbestigasyon nga negatibo ang amo nga impormasyon nga ginpalab-ot sa ila.
Dugang pa sang natungdan, apisar nga negatibo man kag kun may nagapalab-ot sang kasubong nga impormasyon, handa gid sila nga mga kapulisan nga magresponde kag maghatag sang nagakaigo nga bulig sa mga nagakinhanglan.
Nagpanawagan naman ang natungdan sa publiko, nga kun mahimo, makigkoordinar sa ila sang insakto kun may kasubong nga hitabo.
Reported by Bombo Jessa Mae Siman De Los Santos
