ROXAS CITY — Ginatus ka mga deboto sang Black Nazarene ang ginalauman nga magatambong karon sa hapon sa patigayunon nga prusisyon ukon lokal nga bersyon sang ‘Traslacion’ sa pila ka mga barangay sa syudad sang Roxas.
Sa impormasyon nga ginpalab-ot sa Bombo Radyo ni Rev. Fr. Jose Taz Idyl Lasola, mission station priest sang Nuestro Padre Jesus Nazareno Mission Station sa Barangay Baybay sining syudad, magapatigayon man sila sang kapistahan sang Itum nga Nazareno buwas, adlaw sang Miyerkules.
Kasunod sini, nagapatigayon sila karon alas-tres sang hapon sang prusisyon sang imahe sang Black Nazarene gikan sa Roxas City Cathedral kag idul-ong ini sa ila nga mission station sa nasambit nga barangay sa diin nahamtang ang Nazareno Shrine kag didto magahiwat sang Vesper Mass.
Pangunahan naman mismo ni Capiz Archbishop Jose F. Advincula, Jr. D.D., ang misa buwas para sa Feast Day sang nasambit nga patron.
Magluwas diri, iprusisyon man ang isa pa ka imahe sang Itum nga Nazareno sa Barangay Banica sining syudad sa diin ginalauman man ang pagtambong sang madamo nga deboto.
Nahibaluan nga tuigan na nga ginapatigayon ang nasambit nga mga prusisyon sa syudad kasunod sang pagdagsa sang minilyon nga mga deboto sa milagroso nga imahe sang Black Nazarene sa Quiapo Church.
