ROXAS CITY – Wala ginlubong sa duta kundi ginlubong sa tiyan ang nakompiskar nga mga diwal ukon angel wings sa Teodoro Arcenas Trade Center (TATC).
Ini ang pagpati sang nadakpan nga negosyante nga si Ramonita Torres sang mainterview sang Bombo Radyo.
Suno kay Torres nga dako nga kapierdihan para sa isa ka vendor ang pagkakompiskar sang kapin 31 kilos sang diwal.
Nagpanindugan ini nga wala gid siya sang ihibalo kun sa diin ginsalom ang amo nga diwal bangud iya lamang ini nga ginbakal sa guwa sang nasambit nga merkado-publiko sa indi niya man kilala nga babaye.
Una suno diri nga gintanyag sa iya ang diwal sa 300 pesos ang kilo apang naayu-an niya ini sa 270 pesos per kilo.
Plano kuntani sini nga i-transport sa Kalibo, Aklan ang amo nga diwal apang nakompiskar ini.
Mahibaluan nga sang ginlab-ot sang Bombo Radyo ang Officer-in-Charge (OIC) sang pamunuan sang City Agricultures Office nga si Mary Ann Baria, ginpahayag sini nga gindala sa ila talatapan ang nakompiskar nga diwal.
Bangud diri suno sa iya, ginmanduan sini si Regulatory Designated Officer Rizaldy Astrolabio nga ipanghatag sa pila ka ahensiya ang mapuslan pa nga diwal kag ilubong ang mga indi na mapuslan.
Apang suno sa iya nga ginhambalan siya ni Astrolabio nga wala na gid sang mapuslan sa diwal rason nga ginlubong niya na lamang ini tanan.
Apang nagapanindugan ang negosyante nga si Torres nga nagapati siya nga indi sa duta kundi sa tiyan ginlubong ang iya mga diwal.
Mahibaluan nga hugot nga ginadumilian ang pagsalom sang diwal bangud indi pa sini sang harvest season.
Sa pihak nga bahin, nagapati ang barangay kagawad sang Barangay Punta Cogon, Roxas City nga may yara sang pagsalangisag sa pahayag sang negosyante nga nakuhaan sang diwal kag sa imbestigasyon sang mga kapulisan.
Suno kay Barangay Kagawad Castor Aguilos Jr., sang gin-usisa sang mga kapulisan ang negosyante nga si Torres, nag-ako ini nga iya nabakal ang diwal kay Josing Dela Cruz.
Kabaliskaran ini sa pahayag ni Torres nga wala siya nakakilala sa iya ginbaklan nga babaye sa nasambit nga merkado-publiko.//
Ginkompirmar man ni Aguilos nga residente sang ila barangay si Dela Cruz.
Posible suno kay Aguilos nga nalutsan ang mga katapo sang Bantay Dagat sa ila lugar bangud posible gab-i ginsalom ang amo nga diwal.
