Nangin mabudlay para sa lokal nga Gobyerno sa banwa sang Ivisan ang pagpadali clearing sang dalan nga ginluntaran sang landslide bangud sa madamol nga mga lapok kag dalagko nga mga bato.
Sa interview sang Bombo Radyo kay Mayor Felipe Neri Yap, alkalde sang Ivisan, ginpahayag sini nga nakig-angut na siya sa city province sa pagrequest sang mga heavy equipment agud gamiton sa pagclearing sang lugar.
Ginapahayag pa sini nga, wala ini gilayon nakahulag bangud nauna ang banwa sang Sapian sa paggamit sang mga equipment kag ginpasiguro man nga buwas nga adlaw pagasuguran na ini.
Dugang pa ni Yap nga, indi madali-dali ang pagsulod sang equipment bangud sa makitid nga dalan kag indi basta-basta makahulag ini.
Apang wala naman nagapabaya ang alkalde agud masulosyunan ang kasubong nga problema sa amo nga lugar.
Ginpasiguro naman ni Mayor “Ipe” nga mapalayo kag mabutang sa maayo kag safe nga lugar ang lima ka mga pamilya nga nag-evacuate sang nagluntad ang landslide.
Sa karun, ginpahayag sini hulaton nalang sang mga pumuluyo nga makuha na ang nakaharang nga mga lapok sa karsada kag makaagi na ang mga salakyan.
