Natumod na sang gobyerno kun ano nga grupo ang nag-umpisa sang mapintas nga insidente kahapon sa Ayala bridge kag Mendiola nga nagresulta sa pagkapilason sang madamo nga pulis kag pila ka sibilyan.
Gintumod ni DICT Secretary Henry Aguda ang grupo nga anonymous.ph nga nag-umpisa sang pagpangganyat sang pagginamo online.
Suno sa iya, ini ang isa sa aktibo nga grupo nga nagpang-engganyo nga magsuksok sang itom nga maskara kag bayu kag mag-upod padulong sa bahin sang Malakanyang.
Nagakoordinar na suno sa iya sila sa nasambit nga grupo apang tubtob subong, wala pa sa gihapon nagasabat sang direkta kun sila gid man ukon indi ang nagpatigayon sang amo nga kinagamo.
Dugang pa ni Aguda, may yara na sila sang persons of interest nga gina-obserbaran.
Samtang, ginsiling man ni DILG Secretary Jonvic Remulla nga may intelligence report sila nga nabaton nga ang matuod nga target sang nasambit nga mga grupo amo ang sungon ang palasyo sang Malakanyang.
Sa subong, nagapadayon ang ginapatigayon nga pag-imbestigar sang ahensya.
