Roxas City – Plano sang City Government nga magtukod sang suicide squad kasunod sang asud-asod nga kaso sang paghikog sa siyudad sang Roxas kag probinsya sang Capiz.
Ini ang naestoryahan sa ginpatigayon nga sinapol sang Suicide Crisis Committee kaupod si Roxas City Mayor Ronnie Dadivas sa talatapan sang alkalde.
Suno kay Dr. Lorelie Cajilog, city health officer nga ginaplanohan pa kun ipaagi sa isa ka executive order nga ipaguwa sang alkalde sang siyudad ukon ipaagi sa pagdihon sang ordinansa ang pagtukod sang suicide squad.
Suno kay Cajinog nga magapahamtang sila sang suicide squad sa mga kabaranggayan sa siyudad kun sa diin mangin dalangpan sang mga pumuluyo nga may yara sang ginasuprer nga problema.
Ginapangabay ang mga barangay officials nga mangin mabinantayon sa sitwasyon sang ila mga nasakupan nga mahimo mangin factor sang suicide.
Ginpahayag ni Cajilog nga kinahanglan makapaidalom sa paghanas ang miyembro sang suicide squad agud may yara ini sang ihibalo para masulusyunan ang problema sang isa ka tawo nga nagasuprer sang depresyon.
Sa nasambit nga sinapol ginpamatian ang ginpresentar nga solusyon sang magkatuhay nga sektor agud matuldukan ang problema sa suicide.
Indi malipod nga kadam-an nga nagahimo sini ang mga pamatan-on nga naga-edad 14 tubtob 20 anyos rason nga dako ang papel sang eskwelahan sa paggiya sa ila estudyante mangin sa emosyunal nga aspeto.
Apang, dako sa gihapon ang papel sang pamilya ilabi na sang mga ginikanan sa pagsiguro sang mapag-on nga relasyon sa ila kabataan nga sarang nila mapalapitan sa tion sang problema.
