Dismayado ang grupo sang mga mamumugon matapos wala gin-aprubahan ang ginaduso nga P200 daily wage increase sang Regional Tripartite Wages and Productivity Board (RTWPB)-6.
Sa interview sang Bombo Radyo kay Elmer Forro, Chairman sang United Labor Alliance Panay, iya ginpahayag nga ginapakamalaut sang grupo ang nangin desisyon nga P37-P45 lang ang gin-aprubahan sa byalo nga P200 kuntani ang ila ginaduso nga ginakabig nga liveable wage.
Suno kay Forro, tuman ka gamay sang P37 para sa mga non-agriculture, industrial, kag commercial establishments nga may yara sang masobra 10 ka empleyado kag P45 sa mga establishments nga may yara sang mas manubo sa 10 nga empleyado.
Pahayag pa niya, daku kuntani nga bulig sa mga mamumugon ang P200 nga wage hike agud makapahagan-hagan sang gastos bangud sang padayon nga pagtaas sang presyo sang mga balaklon.
Dugang pa sang natungdan, tinghuhaan nila nga iapalab-ot sa Kamara ang ginaduso nga P200 daily minimum wage increase agud liwat nga mabuksan ang hagna sa pagpataas sang sweldo sang mga mamumugon.
Interviwed by: Bombo Francis Biñas via Bombohanay sa Udto
