ROXAS CITY – Nagdangop sa Bombo Radyo ang grupo sang mga tricycle drivers agud ireklamo ang pagbiyahe sang mga mini-buses sang Pueblo de Panay sa siyudad sang Roxas.
Partikular nga ginareklamo sang mga ini amo ang legalidad sang operasyon sang mga mini-buses kalakip na ang pag-kwestiyon kun may prangkisa ini.
Suno sa wala na ginhingadlan nga tricycle drivers, wala sila sang may nakit-an nga plaka nga nakatapik sa mga mini-buses.
Indi ini sang patas suno sa iya bangud may mga ginabaydan sila nga mga tricycle drivers nga kantidad para lamang maka-renew ukon maka-apply sang ila prangkisa.
Ginareklamo man sini ang indi sang patas nga pagpanakop sang mga traffic auxiliaries bangud may mga mini-buses nga nagapondo sa no loading/unloading area apang wala ginadakop.
Dugang pa sini nga reklamo ang indi pagsunod sang mga mini-buses nga nagabiyahe Pueblo de Panay-Culasi vice versa sa ila nga ruta nga indi dapat mag-agi sa Legaspi kag Burgos Street.
Ginareklamo man sini ang under-charging ukon indi pagsunod sang mga driver sang mini-buses sa ila nga taripa kun sa diin sa baylo kuntani nga 11 tubtob 12 pesos ang ila isukot sa pasahero, ginapanubo nila sa 10 ka pesos ang plete.
