ROXAS CITY – Ginkompirmar sang opisyal sang Barangay Dulangan, Pilar, Capiz nga indi tumandok sang ila lugar ang gunman ukon ang nagpangamot sa pagluthang-patay sa supervisor sang Golden Claw Security Agency nga si Retired Master Sergeant Joniffer Borda sa Barangay Bolo sang damlag lang.
Suno kay Barangay Kagawad Remia Dumagpi, tuig 2006 sang nag-abot sa Sitio Bato-Bato sang amo nga barangay si Garry Onilan bangud taga-diri ang iya nga live-in partner.
Nahibaluan nga may yara na sang una nga pamilya sa Masbate si Onilan antes nakilala ang live-in partner sini nga taga-Barangay Dulangan.
Ginpahayag ni Dumagpi nga wala man sang malain nga rekord sa ila lugar si Onilan bangud kilala man ini nga maayo nga tawo kag nagatambag pa kun may magluntad nga kinagamo.
Suno diri nga wala man sila sang ideya nga nagaserbi nga gunman si Onilan sa anuman nga krimen bangud sa ila pagkahibalo, nagabaligya lamang ini sang isda gamit ang iya motorsiklo.
Aminado man si Dumagpi nga may mga inadlaw nga indi makit-an ang presensiya ni Onilan sa ila barangay bangud ginapahayag nga nagapangita ini sang trabaho.
Nahibaluan dugang nga may yara sang anom ka mga kabataan si Onilan.
