ROXAS CITY – Ginpahayag ni President Roxas Mayor Receliste Escolin nga indi taga-President Roxas ang suspek sa pagpatay kay anay Punong Barangay Nelson Daluyo, kundi taga Quinto distrito sang Iloilo.
Sa interview sang Bombo Radyo kay Escolin, suno diri nga ginatugyan na sini ang imbestigasyon sa mga kapulisan kag ginhinyo naman sini ang National Bureau of Investigation (NBI) nga tutukan ang amu nga kaso agud mahatagan sang hustisya ang kamatayon sang anay Barangay Kapitan sang Brgy. Bayuyan, sa amu nga banwa.
Ginalantaw man sini nga posible indi mabaton nga kalutusan sa pulitika ang isa sa motibo sang suspek.
Bangud sa natabo, luyag ni Escolin nga kakason sang mga nagasakay sa motorsiklo ang ila helmet kun naga-pasulod sa banwa sang President Roxas agud makilala.
Bilang bulig ni Escolin, magahatag sang bulig pinansyal ang ila LGU para sa nabilin nga pamilya ni anay Barangay Kapitan Daluyo.
Nahibaluan nga sang nagliligad lang nga tuig nagtaliwan ang tiayon sang biktima bangud sa ginapahayag halit sang COVID-19.
