Ginaduso ni House Deputy Majority Leader kag ACT-CIS Partylist Rep. Erwin Tulfo nga pamatbatan sang mabug-at nga silot kag pagkapriso sa sin-o man nga manugtunto kag mangbiktima sang mga Overseas Filipino Workers lakip na ang pamilya sang mga OFWs.
Isa ka hagna ang nakatalana nga i-file ni Rep. Tulfo subong nga adlaw, Enero 13, 2025 sa pagbukas sang sesyon sang Kamara. Ini amu ang House Bill nga ” An act penalizing fraud against Overseas Filipino Workers and providing penalties for violation thereof.”
Magluwas kay Tulfo, author man sa nasambit nga hagna sanday Rep. Edvic Yap, Jocelyn TUlfo, Benguet Rep. ERic Yap kag Quezon City 2nd District Rep. Ralph Wendel Tulfo.
Ginpahayag ni Tulfo nga kadam-an sa nababaton nila nga reklamo amu ang mga OFW ang nangin biktima sang mga scammer.
Bangud sini, ginpahayag sang mamalidha nga dapat tapnaon na ang kasubong nga mga pagpanunto gani kinahanglan na sang layi para maprotektahan ang mga OFW.
Ang nasambit nga layi ang mangin Overseas Filipino Worker Protection Against Fraud Act of 2025.
Sa idalom sang layi ginakilala ang invaluable contributions sang mga OFWs ilabi na sa national development nga may katuyuan nga protektahan ang ila ginpangabudlayan nga kita nagikan sa mga pagpanunto kag pagpang-abuso.
Indi magnubo sa P10 million ang multa kag 20 ka tuig tubtob life imprisonment sa sin-o man nga mapamatud-an nga guilty sa pagpanunto sa mga OFW.
