Nagdangat sa P54,000 ang ginbilin nga kahalitan sang sunog nga nagluntad sa Barangay Qianayuyan, Dao, Capiz.
Matandaan nga nagluntad ang sunog takna ala 1:09 sang hapon ang Marso 5, kon sa diin ginapanag-iyahan ni Albert Banong, 46 anyos, kag residente man sang nasambit nga lugar.
Sa interview sang Bombo Radyo Roxas kay Senior Fire Officer 3, Rennit P. Gonzaga, Municipal Fire Marshall sang Dao Fire Station, iya ginpahayag nga human sa light materials ang puluy-an ni albert rason nga madasig ini gintupok sang kalayo.
Suno pa kay Gonzaga, wala man sang tawo ang amo nga puluy-an sang nagluntad ang sunog.
Madasig man nga nagresponde ang mga katapo sang Bureau of Fire Protection Dao, Capiz agud nga gilayon nga mapalong ang kalayo.
Sa subong, padayon pa nga ginaimbestigaran sang Bureau of Fire Protection Dao kun ano ang ginhalinan sang nasambit nga sunog.
Nagpanawagan naman ang natungdan sa publiko, nga magpabilin nga aligmat kag permi nga siguraduhon nga wala na sang kalayo sa dapog, kag mga kagamitan nga nakapangsaksak nga mahimo magtuga sang kalayo agud makalikaw sa sunog.
