ROXAS CITY, CAPIZ- Tuman ang kalipay nga nabatyagan sang isa ka tumandok sang Barangay Cabugao, Roxas City nga nag-rank 10 sa November 2025 Philippine Nursing Licensure Examination.
Sa interview sang Bombo Radyo kay Angelica Ciudadano, Registered Nurse, nga nag-gradwar sa University of San Agustin, Iloilo, iya ginpahayag nga tubtob sa subong, indi pa siya kapati sa resulta bangud nga kaangay nagadamgo pa siya.
Suno kay Ciudadano, ang handom niya kag para sa iya nga pamilya ang nangin inspirasyon sa pagkuha sang amo nga kurso, bangud ang iya nga Iloy, na-diagnose sa balatian nga cancer, kag sa subong, ginakabig ini sang iya nga pamilya ang amo nga kadalag-an nga isa ka dako nga grasya para sa ila.
Pahayag niya, wala nangin mahapos ang iya nga naagyan, umpisa nga nag-eskwela siya, nag-review kag tubtob sa nakapasar sa eksaminasyon. Isa sa mga nangin kasubuan niya, ang tyempo nga nangin malayo ang distansya nila sang iya nga pamilya, apang, ginhimo niya ini nga isa ka inspirasyon agud nga magpadayon para sa handom.
Naghatag naman sang mensahe si Ciudadano sa iya nga mga ka-batch nga napaslawan nga makapasar, nga sa gihapon, magbato lang para sa handom, sa diin suno sa iya, kun subong wala pa mag-abot ang tyempo, sigurado gid nga ihatag ini sa madason nga kahigayunan basta kag nagapadayon lang.
Ginalauman naman ni Ciudadano, ang madamo nga mga oportunidad, agud nga maggamit na niya sa pagpanerbisyo ang iya nga tinapusan sa mga pumuluyo nga nagakinahanglan.
Interviewed by Bombo Sunnie Mae Constantino Batencila
