ROXAS CITY – Ginkumpirmar sang hepe sang Roxas Component City Police Station nga nabaton sini ang sulat ni second district board member Atty. Eleuper ‘Bulilit’ Martinez nga nagahinyo sa hepe nga magpadala sang pulis sa session hall sang Sangguniang Panlalawigan sang Martes, Enero 18, 2021, agud arestuhon si board member Jonathan ‘Sonny’ Besa sa tion nga magadul-ong sang iya privilege speech nga may pagpakalain kag malisyoso nga tinaga batuk kay Martinez kag sa iya pamilya.
Sa interview sang Bombo Radyo kay Pol. Lt. Col. Aron Palomo, ginsiling sini nga sa iya personal nga pag-intindi, kun ang isa ka opisyal sang gobyerno ang yara sa session hall, hilway ini nga magdul-ong sa iya privilege speech sa kun ano man ang luyag sini nga ipahibalo sa iya kaupdanan.
Gani, wala sang otoridad ang mga pulis nga magsulod sa session hall kag magpangdakup.
Sa baylo, gin-abisuhan nalang ni Palomo ang staff ni Martinez nga indi nila mahimo ang hinyo sang board member, kun buot, kun may yara gid man sang pagabuy-an nga defamatory words si Besa, mahimo gid sini nga pasakaan sang kaso nga libel ukon arestuhon sini pinaagi sang citizen’s arrest kag i-turn over sa mga kapulisan.
Ginpahayag man sang hepe nga wala nagapasilabot ang mga kapulisan kun may yara man sang personal nga indi pag-intindhanay ang mga board members.
Nagalaom man si Palomo nga maintindihan ni Martinez ang ila nga trabaho nga indi lang sini luyag nga madalahig ang mga kapulisan sa isa ka bulohaton may kaangtanan sa pulitika.
