ROXAS CITY – Nakahunong na sa karsel sang Sigma Municipal Police Station ang hinablos nga nagtuyo kawaton ang cellphone sang tiyo sa Barangay Matinabus, Sigma, Capiz.
Ginpahayag ni Police Executive Master Sergeant Jolito Magbanua sang Sigma PNP nagaguwa sa imbestigasyon sang pulisya nga nagakatulog ang tiyo nga si Ernie Fabular sang Barangay Madulano, President Roxas sang ginbringka sang hinablos nga si Joden Fernando ang balay kag ginkuha ang tatlo ka mga cellphone.
Apang nabugtawan ini sang biktima kag gilayon nagpangayo sang responde sa mga barangay officials tobtob ila nalagas ang hinablos kag nakuha sa posesyon sini ang tatlo ka mga cellphone.
Ginabulubanta nga nagalab-ot sa P70,000 ang balor sang tatlo ka mga cellphone nga gintuyo kawaton sang suspek nga ginaalegar yara sa impluwensiya sang makahulubog nga ilimnon.
