TAPAZ, CAPIZ – Padayon ang hot pursuit operation sang kapulisan upod ang mga barangay officials sang Barangay San Nicolas, Tapaz, Capiz agud madakpan ang suspek sa brutal nga pagpangbuno sa isa ka lalaki pasado alas-6 sang hapon sang Nobyembre 12, 2025.
Ginkilala ang biktima kay alyas alyas Choy, 45-anyos, kag residente sang Sitio Agtogas, Barangay San Nicolas, Tapaz, Capiz kag ang suspect amo si alyas Moy, 26-anyos, kag residente sang Sitio Martao,sang nasambit man nga barangay.
Suno sa impormasyon halin sa Tapaz Municipsl Police Station, samtang nagalakat ang biktima pakadto sa balay sang iya tiya, gulpi lang nga naggwa ang suspek kag ginbuno ini nga wala sang klaro nga rason, nga nagresulta sa madamo nga pilas sa dughan, liog, nawong, kag likod sang biktima.
Madasig man nga nagpalagyo ang suspect gamit ang motorsiklo.
Madasig naman nga gindala ang biktima sa Tapaz District Hospital, apang gindeklarar nga dead on arrival sang attending physician.
Sa subong, padayon ang pagpanikasog sang kapulisan agud nga madakop ang suspect kag mapasakaan sang nagakaigo nga kaso.
