Nagtanyag si House Deputy Speaker kag Cebu 5th district Rep. Vincent Franco “Duke” Frasco sang tunga sa milyon ka pesos nga padya para sa makahatag sang importante nga impormasyon nga magadul-ong sa pagtukib sang anomaliya sa pagpatuman sang flood control projects sa nasambit nga distrito sa Cebu.
Sa abiso nga gin-isyu sang mamalidha, ginhatagan sini sang importansya nga indi niya pag-itugot ang anuman nga iregularidad ukon substandard works kag lubos nga suportahan ang mga pagtinguha nga masiguro ang transparency kag accountability sa tanan nga proyekto nga ginapondohan sang gobyerno.
Kaangay nga tikang ang ginhimo sang mamalidha matapos ginbuyagyag ni Cebu Citizen Anti-Corruption Watch lead convenor Jun Abines nga isa sa anum ka flood control projects nga nagabalor sang P150 million ang ginhatag sa isa ka construction firm nga ginapanag-iyahan sang kontraktor nga si Sarah Discaya.
Kaangot sini, naghingyo man ang mamalidha sa Central Visayas Office sang Department of Public Works and Highways (DPWH) nga magpatigayon sang imbestigasyon sa tanan nga mga proyekto sa iya distrito kasunod sang panawagan ni Presidente Ferdinand Marcos Jr. para sa malapad nga imbestigasyon sa mga flood control projects.
