Ginpagwa sang mga rebelde nga Houthi ang video sang ila pag-atake kag paglugdang sang Bulk Carrier Eternity C nga may bandera sang Liberia sa Red Sea sang Lunes, Hulyo 7, nga nagpatay sang tatlo ka tawo.
Makita sa video ang mga missiles nga ginlunsyar sang mga Houthi tubtub sa sunod-sunod nga paglupok sa cargo ship nga naglugdang sa barko. Makita man ang pila ka mga armado nga lalaki nga nagasakay sa barko kag nagapakita sang kahalitan nga naangkon sang cargo ship.
Sakay sang cargo ship ang 25 ka mga crew sang naigo sang ballistic kag cruise missiles nga ginlunsyar sang mga Houthis nga tuman nga naghalit sa barko. Kalabanan sa mga crew members nga sakay sang gin-atake nga cargo ship amo ang 21 ka mga Filipino seafarers kag may isa man ka Russian national nga malubha nga napilasan kag nadulaan sang tiil.
Padayon ang pagpangita sa 15 ka mga crew members nga ginreport nga missing kasunod sang pagpang-atake. Narescue na sang mga rescuers ang anum ka mga seafarers matapos nga nalumos sa tubig sa sulod sang isa ka adlaw.
Suno sa US Embassy sa Yemen, ginkidnap sang mga Houthi ang pila ka mga nakalampuwas nga mga tripulante sang cargo ship, apang ginpahayag sang mga Houthi nga gindala nila ang wala gintumod nga kadamuon sang mga tripulante sa isa ka luwas nga lugar.
Ang Eternity C amo ang ikaduha nga barko nga ginlunod sang mga Houthis sa sulod sang duha ka adlaw kag ang ikaapat pagkatapos sang mga pag-atake sang rebelde nga grupo sa MV Magic Seas, MV Rubymar kag MV Tutor.
Una na nga gin-ako sang mga rebelde nga Houthi ang ila responsibilidad sa pag-atake sa Eternity C bangud ginaalegar nga padulong ini sa Israel.
Ginpuntariya sang mga Houthis ang mga barko nga may kaangtanan sa Israel nga nagaagi sa Red Sea bilang pagpakita sang simpatiya sa ila kaalyado, ang Palestinian rebel group nga Hamas sa Gaza, nga nagapakig-away batok sa Israel.
