ROXAS CITY, CAPIZ- Nangin madinalag-on ang duha ka mga nagpasimpalad sa ginpatigayon nga Licensure Examination for Social Workers (LESW) sang Setyembre 8, 9, kag 10, 2025.
Sa interview sang Bombo Radyo kanday Hannah Joy Daynolo, tumandok sang Barangay Dinginan, Roxas City kag nag-gradwar sa Filamer Christian University bilang Summa Cum Laude kag Robert Perez, nga sa subong residente sang Barangay San Esteban, Pilar, Capiz nga nag-gradwar sa Capiz State University-Pilar Satellite College bilang Magna Cum Laude, ila ginpahayag nga kaangay nakibot sila sang nakapasar sa amo nga board exam sa diin tuman nila ini nga ginpasalamat sa Ginoo.
Suno pa sa ila, indi man nangin madali para ang pagkuha sang exam, apang hugot ang ila nga pagpati nga kun para sa ila ang kadalag-an maskin ano ang matabo ihatag gid para sa ila.
Nahibaluan nga ang Licensure Examination for Social Workers (LESW) isa ka importante nga tikang para makuha ang handom nga lisensya kag makapanerbisyo sa napili nga patag.
Samtang, nagpalab-ot naman ang duha sang pagpasalamat sa mga tawo nga nangin kabahin sang ila nga journey kag sa kadalag-an nga ila napagkit, ilabi na sa tagsa nila ka mga ginikanan sa suporta nga ginhatag sumugod nga sila ang nagaeskwela palang tubtob sa nangin propesyonal na.
Interviewed by Bombo Francis Biñas and Bombo Sunnie Mae Batencila
