ROXAS CITY, CAPIZ- Arestado ang isa ka lalaki nga ginakabig High Value Individual (HVI) listed sa Provincial Priority Target List matapos ang ginkasa nga drug buybust operation sang mga kapulisan sa Barangay Balijuagan, Roxas City, takna ala-una sang kaagahon, Hunyo 14, 2025.
Ang arestado amo si alyas “Jose”, 31-anyos, warehouseman kag residente sang Sitio Pangpang, Barangay Bolo, sining syudad.
Sa impormasyon nga nakuha sang Bombo Radyo nagikan sa Roxas City Police Station, ginpahayag nga natigayon nga nadakpan ang amo nga lalaki pamaagi sa isa ka pulis nga nagpakuno-kuno poseur-buyer.
Nakuha sa paghinakop sini ang 22 tanan ka sachets sang ginapatihan shabu, nga ginbabulubanta may kabug-aton nga 150 gramos kag may Standard Drug price nga P1,020,000.
Dugang pa nga narekober sa amo nga lalaki ang buybust money nga nagabalor P10,000 sa diin P100 sini ang subscribed money, kag P9,900 ang counterfeited, isa ka transaparent medium plastic ziplock sachet, isa ka pouch nga nagaduag pula, kag isa ka unit sang motorsiklo.
Natalana naman ini nga mag-atubang sa kaso nga paglapas sa Republic Act 9165 ukon “Comprehensive Dangerous Drugs Act of 2002.”
Sa karon, temporaryo ini nga nagapabilin sa kustodiya sang Roxas City police Station para sa nagakaigo nga disposisyon.
