May yara na sang napili ang mga International Criminal Court prosecutors sang tatlo ka medical experts agud tan-awon ang ikaayong lawas ni anay Presidente Rodrigo Duterte.
Ini ang mga eksperto gikan sa behavioral neurology, neuropsychology kag forensic psychiatry.
Base sa siyam ka panid nga pahayag nga ginpaguwa sang Office of the Prosecutor nga ginpirmahan ni Deputy Prosecutor Mame Mandiaye Niang, ginasuportahan nila ang pag-appoint sang multidisciplinary panel sang mga eksperto agud i-assess ang fitness sang anay Presidente nga mag-stand trial.
Nagpabutyag man ang mga eksperto sang ila kahandaan nga magserbisyo sumugod sini nga bulan.
Ang dokumento nagapahayag man sang pagpamatok sang Prosecution sa pahayag sang Depensa nga ang pag-appoint sang mga eksperto mahimo nga may isyu sang “bias”.
Una, wala ginpahanugutan ang medical officer sang International Criminal Court (ICC) nga tan-awon ang ikaayong lawas sang anay presidente.
Madumduman nga sadtong Marso, nadakpan ang anay presidente bangud sa iya kampanya kontra iligal nga druga sang ini ang presidente pa sang pungsod.
