ROXAS CITY – Natalana nga magpatigayon sang isa ka sinapol ang Liberal Party karon sa gab-i kun sa diin pagapangunahan ini ni Bise – Presidente Leni Robredo kag ni LP – President Kiko Pangilinan.
Ini ang ginpahayag ni Capiz 1st District Congressman Emmanuel ‘Tawi’ Billones Sr. sang mainterview sang Bombo Radyo Roxas.
Suno kay Billones, sa nasambit nga sinapol posible talakayon ang iga-endorso sang partido sa House Speakership bid.
Mahibaluan nga una na nga ginpahayag ni Billones nga wala siya sang personal nga eksperyensiya inangut sa ginbuyagyag ni anay House Speaker Pantaleon Alvarez nga bayranay sang isa ka milyon ka pesos sa tagsa ka kongresista agud makuha ang boto para sa House Speakership.
Sa karon kalakip sa matunog nga mga pangalan sa House Speaker race amo sanday Alvarez, Marinduque Rep. Lord Allan Velasco, Taguig Rep. Alan Peter Cayetano kag Leyte Rep. Martin Romualdez.
