Iloy, ginpapreso ang anak nga nagtapungol sa iya sa Barangay Culasi

ROXAS CITY – Ginpapreso sang isa ka iloy ang isa kaugalingon nga anak matapos nga gintapungol siya sini sa Barangay Culasi, Roxas City.

Ang nagareklamo nga iloy ang ginkilala nga si Marietta De Leon, 54 anyos samtang ang ginpapreso sini nga anak ang ginkilala nga si Santiago Anisco.

Base sa inisyal nga impormasyon nga nakuha sang Bombo Radyo, nagainom si Anisco kaupod ang iya utod sang hinali na lamang nga nagbaisay ang mga ini.

Ang ila komprontasyon ang nagresulta pa sa pagsumbaganay sang mga ini.

Ginpunggan sang iloy ang mag-utod apang sa baylo nga magpati, ginaalegar nga gintapungol pa siya sang anak nga si Anisco.

Bangud diri, ginapakamaayo sang ginang nga ipadakop kag ipapreso ang iya nga anak.