ROXAS CITY – Nagpalab-ot sang pagpasalamat ang isa ka iloy sa Bombo Radyo bangud sa bulig agud ma-rescue ang iya anak nga ginamaltrato kag ginabastos sang iya employer sa Kuwait.
Suno kay Lourdes Clarite sang Barangay Cabugao, Ivisan malipayon siya matapos nakaestorya ang iya nga anak nga si Alora Clarite nga ginamaltrato sang iya lalaki nga amo.
Mahibaluan nga magluwas sa pagpangsakit sang ila amo, ginahikap pa sanday Alora kag kaupod sini nga si Lolita Madriaga nga tumandok sang Subic, Zambales.
Sa bulig sang Bombo Radyo, gilayon nga nahibaluan sang mga natungdan ang sitwasyon sang duha ka Pinay rason nga gilayon sila nga na-rescue sang ila tagsa-tagsa ka mga agencies kag gindala sa embahada sang Pilipinas sa Kuwait.
Bangud diri, indi na magsugot si Lourdes nga magtrabaho pa sa luwas sang pungsod ang iya nga anak.
