ROXAS CITY – Luyag sang iloy sang 11-anyos nga dalagita nga ginaalegar ginhimuslan sang kaugalingon nga tiyo nga makita sa sulod sang karsel ang bayaw nga tricycle driver.
Sa exclusive interview sang Bombo Radyo kay Manang Virgie, ginpahayag sini nga desidido ini nga magpasaka sang panumbungon batuk sa suspek nga bayaw nga si Roger agud mahatagan sang hustisya ang masinapat sapaton nga ginhimo sa biktima.
Suno sa ginang nga tuman kasakit para sa isa ka iloy nga mahibaluan nga ginhimuslan ang iya anak sang indi man iban sa ila.
Aminado ang ginang nga wala ini sang hinalung ong sa natabo sa iya anak bangud nagatrabaho ini sa Metro Manila.
Apang gintawagan ini kag ginsugiran sang iya pakaisa matapos nga nagtuad diri ang dalagita.
Posible nga indi na maagwantahan pa sang biktima ang ginahimo nga kabastusan sa iya sang tiyo, rason nga nagpadulong ini sa balay sang tiya kag ginsugid ang paghimulos sa iya sang suspek.
Bangud diri, na-obligar si Manang Virgie nga magpauli sa diin naglain pa sang iya buot matapos makita nga nagayuhum yuhum pa sa iya ang suspek nga kasubong wala lamang sang natabo.
Nahibaluan pa nga ginkaakig man sang lola sang biktima, nga iloy sang suspek ang ginhimo ni Roger sa kaugalingon nga hinablos nga anak sang napatay nga utod.
Indi malipod nga maka-apat ka beses nga ginhimuslan sang suspek ang menor de edad sa diin ginpahog pa niya ang biktima kag ginhatagan sang P20.00 agud lamang indi magsugid.
