ROXAS CITY – Ginpakigbahin sang isa ka iloy ang iya eksperensya sa iya radyo nga nabaton nagikan sa Department of Education (DepED) nga ginapahayag nagapanguryente.
Sa interview sang Bombo Radyo kay nanay Margie, iloy sang grade 2 pupil sa Dao Elementary School, ginpahayag sini nga nakabaton ang iya bata sang radyo nga ginapanghatag sang DepEd.
Ginpahayag sini nga antes ginhatag ang radyo sa ila gin-orient pa sila sang adviser sang iya bata kun paano ini gamiton kag kun ano nga station ang ila pagapamatian para sa leksiyon sang iya bata.
Ang amo nga radyo ang may yara sang AM kag FM, kun sa diin chargeable kag pwede man nga magamitan sa baterya.
Suno kay nanay Margie nga gin-charge niya ang amo nga radyo apang sang iya ini kuhaon hinali nalang siya nga nakuryente rason nga ini ang iya nga nabuy-an.
Bangud sa natabo madasig niya nga ginkakas sa saksakan ang amo nga radyo sa kahadlok nga madalahig ang iya bata.
Matapos sadto ginpahayag sini nga wala na siya nagliwat nga isaksak ang amo nga radyo bangud sa kakulba kag nadudla na ini.
Dugang pa sini nga indi lang siya ang nakaekspersya sang kasubong sini nga hitabo kundi madamo sang iban pa. Natalana man nga igabalik nila ang amo nga radyo sa eskwelahan matapos nga ginapabalik ini sang mga nanunudlo.
