ROXAS CITY – Padayon sa karon nga ginapadalman sang mga kapulisan ang ila nga imbestigasyon natuhoy sa pagkasapo-patay sa 17 anyos nga dalagita nga nagabusong sa sulod sang iya nga hulot sa Barangay Tiza, Roxas City.
Natalana nga ipaidalom sa autopsy examination ang bangkay sang biktima nga si alyas Love agud matumod kun may yara ukon wala sang foulplay sa kamatayon sini.
Mahibaluan nga ang abyan sang biktima nga iya ginpalihog sang pagpabakal sang prutas ang nakasapo sa biktima nga nagahapa sa iya hulot kag wala na sang kabuhi nga ginapahayag ginasubayan na.
Dugang pa sang iya nga abyan nga nakasugid ang biktima natuhoy sa problema nila sang iya nga nobyo subong man sa iya nga pagbusong.
Sa exclusive interview sang Bombo Radyo sa amay sang biktima, ginpahayag sini nga wala sila sang ideya nga anom ka bulan na nga nagabusong ang anak.
Suno diri nga antes nasapwan-patay ang biktima, nakabatyag ini sang pagpalanakit sang kalawasan matapos ini ang nadanlog.
Nahibaluan pa nga may pila ka mga ga-ob sa lawas sang biktima.
Apang ginklaro sang amay nga posible wala sang kahilabtanan sa kamatayon sang biktima ang resulta sang pagpatpat sa anak kag posible nga bangud sa iya pagbusong ang iya nga kamatayon.
Suno naman kay Manang Daisy, barangay health worker, may nakita nga mga bulong ang nagresponde nga katapo sang Capiz Emergency Response Team (CERT) sa hulot sang biktima.
Kumbinsido suno diri ang mga nagresponde nga nag-inom sang bulong ang biktima nga gintunaan sang iya kamatayon.
Apang sa pagpangusisa sang kapulisan, nahibaluan nga ang nakit-an nga mga bulong ang ginapanag-iyahan sang amay sang biktima.
