JAMINDAN, CAPIZ – Ginalantaw nga ang impluwensya sang makahulubog nga ilimnon ang rason sang pagpangluthang sang isa ka soldado sa iya kaupod sa sulod sang Camp General Macario Peralta sa Jamindan, Capiz.
Sa interview sang Bombo Radyo kay Police Captain Jaypee Silvestre, Officer in charge sang Jamindan Municipal Police Station, iya ginpahayag wala sang nabalhag nga report nga may yara sang daan nga hiligut-anon sa tunga sang duha.
Suno kay Silvestre, ginaproseso na sang pamilya sang biktima ang mga papeles nga kinahanglanon agud mabyahe na ang bangkay sang himata pauli sa ila nga lugar.
Pahayag pa niya, yara pa sa impluwensya sang makahulubog nga ilimnon ang suspek gani wala ini sang matarong nga sabat sang gin-interrogate sang mga otoridad.
Sa subong, ginpasa na sang mga imbestigador ang nakuha nga initial report sa Prosecutor’s Office agud i-file ang kaso nga murder batok sa suspek.
INTERVIEWEED BY: BOMBO ROADNIE DABAN DALANON & BOMBO RONNIE PREGUA JR.
