ROXAS CITY, CAPIZ – Ginaengganyo sang isa ka doktor nga dapat pabakunahan sang mga pet owners ang ila mga alaga nga ido ukon kuring agud makalikaw sa rabies.
Sa interview sang Bombo Radyo kay Dr. Cheyslee S. Descalsota sang Capiz Medical Society, iya ginpahayag nga ang pagbakuna sa hinuptanan nga sapat kaangay sang ido ukon kuring ang depensa sa rabies bangud sila ang source sang infection.
Suno kay Dr. Descalsota nga makuha ang rabies pinaagi sa kagat ukon karos sang sapat kasubong ido kag kuring kun sa diin tuman ini ka delikado kag makamamatay sa tion nga ma-infect kag maglab-ot sa utok sang tawo ang rabies.
Apang preventable ang pagsaka sang kaso sini kag isa sa mga pamaagi agud malikawan amo nga mangin responsable ang mga pet owners pinaagi sa pagpabakuna sang ila mga sapat kag indi pagtugutan nga maglagaw bisan diin nga lugar.
Mensahe sini nga ang pagpakigbato sa rabies responsibilidad sang tagsa-tagsa para masiguro ang rabies free nga komunidad, panugyan man sini nga magpalapit sa mga animal bite center ukon DOH accredited nga animal bite center kun may mga sintomas sang rabies nga nabatyagan ang isa ka indibidwal.
