ROXAS CITY – Padayon ang clearing operation sang 61st Infantry Hunter Battalion Philippine Army sa mga katapu sang New People’s Army sa Barangay Bayuyan, President Roxas, Capiz.
Sa exclusive interview sang Bombo Radyo kay Lt. Col. Joel Benedict Batara, battalion commander sang 61st IB PA, ginkumpirma sini nga mga katapu sang Sangay sa Partido sa Platoon (SPP)-East, Komiteng Rehiyon – Panay ng CPP-NPA sa pagpamuno ni Liberato Palencia ukon Prudencio Samson alyas Guning ang naka-engkwentro sang militar sa nabukid nga bahin sang Barangay Bayuyan sa amo nga banwa.
Suno sa opisyal nga may impormasyon sila nga nabaton nga may sightings na sang mga rebelde sa nasambit nga lugar kag nagapatigayon sang recruitment sa mga menor de edad ang mga NPA.
Nagapadulong pa lamang ang mga soldado sa area sang maka-engkwentro nila ang mga rebelde rason nga nagbayluhanay sang luthang ang magtimbang nga bahin.
Nagdugay sang 20 minuto ang engkwentro tobtob nagwithdraw ang kapin sa 15 ka mga rebelde padulong sa direksyon sang Barangay Badiangon, President Roxas.
Wala sang may napilasan sa bahin sang militar
Samtang na-rekober sang mga soldado sa lugar ang isa ka portable generator, (1) multi-media projector, (2) hand grenades, (1) anti-personnel mine, (8) rifle grenades, (4) na back packs, (2) cellphones, (1) container sang gasolina, (2) sako ng bigas, pila ka personal nga kagamitan kag subersibo nga mga dokumento nga may high intelligence value.
