Indi paglapas sa separation of powers sa tunga sang simbahan kag sang estado ang ginkasa nga “national rally for peace” sang Iglesia ni Cristo, suno kay Senadora Imee Marcos.
Nagapati ang nasambit nga senadora nga wala ginabawal ang paghiwat sang kasubong nga klase sang rally.
Sa pagkamatuod suno diri ang rally ang nagaganyat pa sang hilway nga pagpahayag nga nakasaad sa Saligang Batas.
Nagapati naman ang liderato sang Senado nga non-debatable ang ginpatigayon nga peace rally sang INC kahapon nga adlaw.
Ginsuportahan naman ni Senate President Francis “Chiz” Escudero ang tinutuyo sang nasambit nga event kag luyag man ini sang mayorya, present man sila ukon indi bangud handom man nila nga maghiliusa ang mga lider sang pungsod.
Para kay Escudero wala sang pulos nga sapakon ang mga isyu nga nkatuyuan nga buhinan ang panawagan para sa kalinungan kag paghiliusa sa pungsod sa panahon nga ini.
Samtang, nanindugan naman si Senate Majority Leader Francis Tolentino nga ang iya nga pagtambong sa event ang indi bangud sa pulitika kundi para sa paghiliusa ukon unity sang pungsod.
Una na nga gin-athag sang INC nga ang rally ang pagpahayag sang suporta sa opinyon ni Pangulong Ferdinand Marcos Jr. nga indi na pagdayunon ang impeachment batuk kay Vice President Sara Duterte bangud nagauyang lamang ini sang oras sa mga mamlidha kag i-focus nalang ang tion sa pagresolba sa mga problema sang pungsod.
