ROXAS CITY – Ginklaro ni Mayor Ronnie Dadivas nga wala ini nagapamalabag sa pagpauli sang mga Capizeño sa Roxas City.
Kasunod ini sang ginpadala nga sulat sang alkalde sa Western Visayas Regional Task Force on COVID-19 nga nagahinyo sang 14-day moratorium ukon pagpauntat anay sang pagpapauli sang mga Locally-Stranded Individuals (LSI’s) kag Returning Overseas Filipinos (ROF’s).
Ginpahayag ni Dadivas nga indi ini pagpamalabag sa ila pagpauli kundi ‘time-out’ gid lamang.
Suno sa alkalde nga ang padayon nga pagsaka sang kaso sang coronavirus disease (COVID-19) sa probinsiya partikular na sa siyudad ang nagtulod sa iya agud himuon ang nasambit nga tikang.
Partikular man nga rason sang iya nangin lihok ang pagkapagkit na sang locally-transmitted cases sa siyudad.
Magluwas diri suno sa alkalde, limitado lamang ang quarantine facilities sang siyudad para sa mga LSI’s kag ROF’s.
Sa karon suno sa iya, 13 tanan ka mga quarantine facilities ang ginagamit sang siyudad kag lunsay puno na ini.
Sa sulod sang 14 diyas suno sa alkalde, diri pagatutukan ang masangkaron nga contact-tracing efforts agud indi na maglapta ang virus.
Kinahanglan man ini suno sa iya samtang ginahulat pa ang resulta sang real-time polymerase chain reaction (RT-PCR) tests sang mga LSI’s kag OFW’s.
Magluwas diri, nagakadapat man suno sa iya nga mahatagan sang malip-ot nga panahon ang mga frontliners kag medical workers agud makapahuway pinaagi sa temporaryo anay nga pagpauntat sa pagpapauli sang mga LSI’s kag OFW’s.
Nagalaom naman si Dadivas nga paboran ang ila nga ginaapelar bangud para man ini sa kaayuhan sang siyudad.
