Nagapati si Philippine Navy spokesperson for the West Philippine Sea (WPS) Rear Admiral Roy Vincent Trinidad nga posible pa maliwat ang mga insidente sang bungguanay myentras padayon ang “illegal, coercive, aggressive kag deceptive (ICAD)” actions sang China.
Suno sa Philippine Navy official, halin sang nag-umpisa ang iligal nga presensiya sang People’s Liberation Army (PLA) Navy, nangin rason na ini suno sa iya sang pagkabalaka ang ila nga mga iligal kag agresibo nga aksiyon rason nga tubtob sa karon, padayon ang China sa pagpatigayon sang mga iligal nga aktibidad kag presensiya, indi imposible nga matabo liwat ang insidente nga natabo sang Lunes, Agosto 11 kun sa diin nagsalpok ang Chinese Navy warship sa China Coast Guard vessel samatang ginalagas sini ang barko sang Philippine Coast Guard nga BRP Suluan malapit sa Scarborough Shoal, nga yara sa misyon para magdul-ong sang suplay para sa mga Pilipino nga manugpangisda.
Suno kay Rear Admiral Trinidad, indi ini ang una nga kahigayunan nga nanghilabot ang barko nga panggyera sang PLAN sa pagpangharass sa mga barko sang Pilipinas sa West Philippine Sea. Nagpatigayon na man suno sa iya ang mga Chinese warship sang PLAN sang coercive kag agresibo nga mga aksyon sa West Philippine Sea sa nakaligad nga 20 ka-tuig na ukon masobra pa.
Sa pihak sini, ginsiling sang Philippine Navy official nga ang tanan sang mga aksiyon sang Sandatahang Lakas ng Pilipinas ang permi nga nagatuman sa nakasaad sa international law.
Nagalaom naman si Rear Admiral Trinidad nga magserbe bilang paandam ang insidente sang Lunes para sa tanan nga players sa maritime domain agud ipabilin ang pagpugong-pugong kag siguraduhon ang ila nga aksyon nakasunod sa ginatalana sang UN Convention on the Law of the Sea (UNCLOS), Collision regulations, kag iban pa agud malikawan ang mga engkwentro sa kalalawran.
