Ginmanduan sang International Criminal Court Prosecution ang kampo ni Former President Rodrigo Roa Duterte nga klaruhon ang papel sang anum ka Filipino Lawyers nga nagtambong sa confirmation of charges sa The Hague, Netherlands.
Sa ginpatigayon nga proceedings sang Pebrero 23 tubtob 24, ginpakilala ni Defense Counsel Nicholas Kaufman sanday Atty. Salvador Medialdea, Atty. Salvador Panelo, Atty. Martin Delgra, Atty. Silvestre Bello, Atty. Alfredo Lim, kag Atty. Cesar Dulay bilang mga abogado sang depensa apisar nga nagapungko ang mga ini sa public gallery.
Samtang, nagpagwa sang separado nga pahayag si Kaufman nga nagapakig-angot sa ila si Atty. Medialdea kag Atty. Delgra.
Sa pihak nga bahin, nagaplano man si Atty. Salvador Panelo nga mag-apply sang accreditation agud buligan ang kaso ni Duterte.
Nagpaandam man ang prosecution nga ang nasambit nga mga pahayag ang nagatuga sang impression nga makabig na nga kabahin sang defense team ni Duterte ang anum ka mga abogado kag mahimo na nga maka-access sa mga confidential case materials.
Ginhingyu sini ang chamber nga i-require ang depensa nga kumpirmahon ang record nga ang anum ka Filipino lawyers ang indi miyembro sang defense team, wala sang may nabaton nga disclosure, indi maka-access sa non-public filings kag indi entitled sa pribilihiyo nga makigkita kay Former President Duterte sa Detention Cell.
Nahibaluan nga gin-file ang request sa idalum sang Article 68 sang Rome Statute agud maproteheran ang kaluwasan kag privacy sang mga biktima kag witnesses sang kaso.
