Wala nagapati ang mga investors sa Barangay Libas sa alibi sang ginatudlo mayor nga upline sang investment scam nga si Ana Mae Barroa.
Gintawag pa sang mga investors si Barroa nga butigon kag manugpatalang sa ila pag-atubangay sa barangay hall sa diin indi na sa karon mahibaluan kun diin nagkadto ang P30 million nga ila ginpay-in sa ginang nga ginapanindugan nga wala sa iya ang nasambit nga kantidad.
Ginpahayag ni Alyas Lyn, isa sa may pinakadaku nga investment sa double your money scam sa Barangay Libas nga wala sila nagapati nga naga-exister si Josephine Ramos, ang pangalan nga ginatudlo ni Barroa nga yara sa likod sang nasambit nga investment scheme.
Suno pa sa ginang nga wala nagasantu ang statement ni Barroa sang nag-atubangay na sila sa barangay hall kag sang yara ang presensiya sang media.
Ginkumpirma man ni alyas Lyn nga desidido sila nga magpasaka sang panumbungon batuk kay Barroa sa diin kun indi mabalik ang ila hard earned money nga ginpasalig ma-doble, mas maayo nga makita nila ini sa presuhan.
Suno naman kay alyas May nga ba-se sa ila nakuha nga impormasyon gikan sa mga kaingud balay ni Barroa kasubong nag-asenso ang pangabuhi sini humalin nga nagabaton ini sang mga nagapay-in sa double your money scam.
Nahibaluan pa nila nga masami na nga nagapa-deliver sang pagkaon ang nasambit nga pamilya nga sadto wala nila ginahimo.
