ROXAS CITY – Totally burned ang isa ka puluy-an sa Brgy. Agnaga banwa sang Cuartero, matapos ang nagluntad nga sunog sang tinalikdan Marso 13, 2022.
Ginkilala ang tag-iya sang puluy-an kay Rey Armada, 43-anyos, isa ka mangunguma kag residente sang nasambit nga lugar.
Sandig sa impormasyon nga nakuha sang Bombo Radyo sa BFP-Cuartero, nga gintupok gid sang kalayo ang amo nga puluy-an nga human sa light materials kag sa ila pag-imbestigar lunsay tulog ang tanan nga miyembro sang pamilya ni Armada.
Mahibaluan nga apat sila ang nagapuyo sa amo nga puluy-an lakip na diri ang iya duwa ka kabataan kag iya asawa.
Nabugtawan nalang ang tag-iya sang balay nga naganiragasak kag nagadaba-daba na ang kalayo nagikan sa ila nga balkonahe.
Bangud sa madasig nga paglapta sang kalayo ginpamukaw nalang ni Armada ang iya pamilya kag madasig nga nagguwa sa ila puluy-an.
Maswerte naman nga wala sang napilasan sa pamilya Armada.
Ginabanta nga nagalab-ot sa kapin P132,000 ang nangin kahalitan sang nasambit nga sunog.
Sa karun, nagapangayo gid sang bulig ang nasambit nga pamilya bangud wala gid ang mga ini sang may nasalbar nga kagamitan.
