Patay ang isa babaye samtang pilason naman ang iya live-in partner matapos aksidente nga malapakan sang isa ka 10-wheeler truck sa Sitio Proper, Barangay Agloway, Panitan, Capiz
Ang napatay amo si alyas Cristina 54 anyos, residente sang Barangay Manoling, President Roxas, Capiz, samtang ang driver sang motorsiklo amo si alyas Pacifico, 63 anyos, residente sang Barangay Solo, Pontevedra, Capiz.
Sa interview sang Bombo Radyo kay Police Lieutenant Larry P. Pasmo, Deputy Chief of Police sang Panitan Municipal Police station, iya ginpahayag nga samtang ginasubay sang truck nga may karga sang tubo kag sang sang mga biktima ang kapareho sini nga direksyon hinali na lang nga nadulaan sang control ang driver sang truck rason nga aksidente ini nga naatrasan kag nalapakan ang motorsiklo sang mga biktima.
Bangud sini, ginbawian sang kabuhi ang babaye, samtang nag-angkon naman sang mga pilas sa nagkalain-lain nga bahin sang iya lawas ang driver nga live-in partner sini matapos nga nakalumpat sa motorsiklo.
Gin-aresto naman sang kapulisan ang driver sang truck kag possible magapangatubang sang kaso nga Reckless Imprudence Resulting in Homicide, Physical Injury kag Damage to Property.
Sa subong, padayon pa ang imbestigasyon sang kapulisan angut sa nasambit nga insidente.
Nagpanawagan naman ang natungdan nga perme gid maghalong kag i-check ang mga salakyan agud malikawan ang kapareho nga insidente.
