ROXAS CITY – Nagpanugyan ang punong barangay sang Barangay Cagay sining siyudad nga likawan ang diskriminasyon sa mga indibidwal nga nagpositibo sa COVID-19.
Ini ang ginpahayag ni Punong Barangay Arturo Aragon sang mainterview sang Bombo Radyo.
Suno kay Aragon nga may yara sang panibag-o nga nagpositibo sa COVID-19 nga residente sang ila nga barangay.
Isa ini ka health care worker nga nagatrabaho sa private hospital diri sa siyudad kag residente ini sang isa ka subdivision kun sa diin ginapatung-an sang Sitio San Isidro kag Sitio Pagutok sang amo nga barangay.
Nahibaluan nga nagapaidalom na ini sa quarantine matapos nga wala man ini nakabatyag sang anuman nga sintomas sang COVID-19.
Subongman ang iya mga himata nga nangin kaupod sini sa ila balay ang nagapaidalom naman sa strict home quarantine.
Magluwas diri, ginpanugyanan man sang amo nga opisyal ang duha ka driver sang amo nga pasyente nga magpaidalom man sa strict home quarantine kag likawan ang pagguwa sa ila tagsa ka mga balay agud malikawan ang pagdamo sang COVID-19 sa ila lugar.
Sa karon, padayon ang ila contact tracing sa mga indibidwal nga nakahalubilo sang nasambitan nga COVID-19 patient.
Nahibaluan nga may yara na sa 11 ka mga kumpirmado nga kaso sang COVID-19 ang narekord sa Barangay Cagay kun sa diin ang iban sa ila ang nagapaidalom naman sa quarantine.
