ROXAS CITY-Patay ang 36-anyos nga lalaki matapos nga nagbungguanay ang duha ka mga motorsiklo sa Barangay San Esteban, Pilar Capiz.
Ginkilala ang napatay nga si Marlon Francisco 36-anyos residente sang nasambit nga lugar.
Sandig sa inisyal nga imbestigasyon sang Pilar Municipal Police Station nga samtang ginasubay ni Francisco ang dalan sakay sa motorsiklo sang aksidente nga nakabungguan sini ang kasugata nga motorsiklo nga ginamaneho ni Christian Paul Felicicimo. 25-anyos residente sang Barangay Botongon Estancia, Iloilo.
Bangud sa tuman nga kabaskugon sang pagbungguanay, nakaangkon sang patal nga pilas si Francisco nga madasig nga gindala sa Jesus Colmenares District Hospital sa banwa sang Balasan apang gindeklarar ini nga dead on arrival.
Samtang nakaangkon naman sang pilas sa magkatuhay nga porsyon sang kalawasan si Felicicimo nga gindala sa Bailan District Hospital apang ginsaylo sa isa ka pribado nga ospital sa Roxas City.
Sa karon, nagapadayon pa ang imbestigasyon sang mga kapulisan sa banwa sang Pilar.
