ROXAS CITY-Natigayon nga marescue ang isa sa 39 ka mga Pinoy seaman nga sakay sa naubon nga barko sa kadagatan sang Amami Oshima island sa East China Sea nga sakop sang Japan.
Sa interview sang Bombo Radyo kay Bombo International Correspondent Juvy Lala Flores Abecia ginpahayag sini nga kapin sa 43 ka mga crews ang sakay sang Gulf livestock 1 kag 5,800 ka mga baka.
Suno kay Abecia nga na-rescue sang mga katapo sang Japanes Coast Guard ang isa ka pinoy nga si Ship Chief officer Eduardo Sareno 45-anyos matapos nga nakita sa tunga sang kalalawran nga nakasuksok sang life vest kag nagapangayo sang bulig.
Nahibaluan nga nagikan ang cargo ship vessel sa bahin sang New Zealand kag padulong kuntani sa China sang ginhampak ini sang mabaskog nga balod dala sang Typhoon Maysak rason nga ini naubon.
Ginapahayag nga gilayon nagsuksok sang life jacket kag naglumpat si Sareno sang amat-amat na nga nagalugdang ang amo nga Cargo.
Suno pa kay Sareno nga wala na sini nakita ang iban nga mga kaupdanan sini nga mga crew member matapos nga nakalumpat na ini sa amo nga cargo.
Mahibaluan nga sakay sa nasambit nga cargo ang 45 ka mga crew members kun sa diin ginalakipan ini sang 39 ka mga pinoy seaman, duha ka Australians kag duha ka New Zealanders.
Padayon naman ang search and rescue operation sang mga patrol boat sang Japanes Coast Guard sa mga indibidwal nga nagapabilin nga missing.
Sa karon, nagapangamuyo na lamang ang mga Filipino community sa Japan nga maluwas ang mga pinoy nga sakay sa naubon nga cargo vessel.
