ROXAS CITY – “Mabuot na nga bata si Jinggoy, sakto lang na gani magyuhom-yuhom.”
Ini ang nangin pahayag ni Punong Barangay Melady Calinao sang Barangay Balighot, Maayon sang mainterview sang Bombo Radyo.
Suno kay Calinao, subang sa lima ka mag-utod si Gilbert “Jinggoy” Berte, may asawa kag duha ka mga kabataan kag nagtrabaho sa konstruksyon kaupod ang iya nga amay.
Pahayag ni Kapitan, nasubaybayan sini ang pagdako ni Jinggoy bangud kalapit balay malang sila kag malaragway sini nga isa ka responsable, mabuot nga bata kag wala sang rekord sa barangay.
Sa panaysayon sini nga tuman nga apektado ang iya mga ginikanan sa natabo. Pagkatapos sang insidente nga pagpangluthang kay kapitan Dullano, nagtawag pa ang suspek sa iya nga amay kag naglaong nga magalakat ini kag ginatugyan sa ila ang iya mga kabataan.
Apang sa mga masunod nga inadlaw, ginkakibot sang opisyal, pamilya kag sang mga pumuluyo sa nasambit nga barangay nga isa si Jinggoy sa suspek sa pagpangluthang-patay kay ABC President Frederick “Dikoy” Dullano.
Matandaan nga ginluthang-patay sang riding-in-tandem ang Punong Barangay sang Tabuc nga si Kapitan Dikoy sang Hulyo 7, kun sa diin ang gunman ang ginkilala kay Renante ‘Tunggak’ Banate kag ang driver sang motorsiklo amu si Gilbert “Jinggoy” Berte.
Dugang pa ni Calinao nga handa magkooperar sa mga kapulisan ang pamilya ni Jinggoy kun may yara sang impormasyon sa ginakahamtangan sang suspek.
