Ginpakamalaot sang Israeli Foreign Ministry ang pagpang-atake sang Iran sa diin lakip ang mga civilian buildings ang ginpangpuntirya nga nagresulta sang kamatapon sang isa ka pinay.
Ang pinay nga napatay ang ginkilala nga si Mary Anne Velazquez de Vera, isa ka Filipina caregiver, sa Tel Aviv.
Suno kay Oren Marmorstein, spokesperson sang Israeli Foreign Ministry, ang mga building nga gin-target sang Iran may ara sang mga kabataan kag mga katigulangan.
Ginpahayag man sini nga ang ginahimo sang Iran nga pag-atake sa mga sibilyan baliskad sa ginahimo sang Israel, nga nagapokus lamang sa military sites.
Dugang pa sang natungdan, nga indi lang sa Israel ginpatigayon ang pagpang-atake sang Iran kundi pati sa walo pa ka mga pungsod sa Middle East.
Ang pagpa-ulan sang Iran sang missiles kag drones kabahin sang ila pagtimalos matapos nga gin-atake sang Israel kag Estados Unidos ang Supreme Leader sang Iran.
