Naglunsar sang airstrike ang Israel sa bahin sang bagatnan sang Syria matapos ang report nga duha ka projectile missiles ang ginpalupok sang Syria sa Israel, nga wala man nagtuga sang halit.
Gin-akusaran sang Israel si Syrian interim President Ahmed al-Sharaa nga ginapahayag nga amo ang responsable sa mga pag pang-atake.
Apang, ginsiling sang Syria nga ang mga airstrike ang isa ka paglapas sa ila nga soberanya kag katuyuan nga patumbahon ang amo nga pungsod.
Madumduman nga umpisa sang natumba ang rehimen ni Bashar al-Assad sang Disyembre 2024, ginpabaskog sang Israel ang mga opensiba sini batuk sa Syria.
Wala pa maklaruhan kun sin-o ang yara sa likod sang pagpalupok sang amo nga missiles kag nagpamalibad man ang Syria nga kumpirmahon kun nagikan ini sa ila nga teritoryo.
Kadungan sini, ginsaway man sang United Nations ang mga pang-atake sang Israel, samtang gin-anunsyo sang Estados Unidos ang pagkanselar sang mga sanctions nga ginpamatbat sa Syria umpisa pa sang civil war, nga nagpatay sang masobra 600,000 ka tawo.
