Nag-apela si Israeli Prime Minsiter Benjamin Netanyahu sa mga residente sang Lebanon nga pahilwayon ang ila pungsod halin sa militante nga Hezbollah agud matapos na ang giyera.
Sa isa ka video address sa mga taga-Lebanon, ginsiling ni Netanyahu nga may tion ang mga ini nga masalbar ang Lebanon bag-o ini tayuyon nga malubog sa madugay nga giyera nga magaresulta sa destruksiyon kag pagpangabudlay kasubong sang nakita sa karon nga sitwasyon sa Gaza.
Ginhimo ni Netanyahu ang apela kasunod sang pagpalawig pa sang Israel sang ila ground invasion batuk sa Hezbollah pinaagi sang pagpadala sang nilibo nga mga tropa sa new zone sa south-west Lebanon.
Samtang, wala naman nagpapugong ang kampo sang Hezbollah sa pihak pa sang 3 ka semana nga air strikes sang Israel kag iban pa nga mga pag-atake sa Lebanon nga nagpatay na sa masobra 1,400 ka tawo kag nagresulta sa pagka-displace sang 1.2 milyon ka indibidwal.
